Josva kap. 3
Uppsetan
Bíbliu útgáva
Tema
c.
The Crossing of the Jordan
3:1-4:24
1
Tíðliga morgunin eftir gjørdi Josva seg til reiðar, helt avstað úr Sittim við øllum Ísraelsmonnum og kom at Jordan; har steðgaðu tey náttina av, áðrenn tey fóru yvirum.
2
Men táið tríggir dagar vóru umlidnir, gingu umsjónarmenninir um tilhaldið
3
og góvu fólkinum hetta boð: „Táið tit síggja sáttmálaørk HARRANS Guds tykkara, og hinar levitisku prestar koma berandi við henni, skulu tit fara, haðani sum tit eru stødd, og fylgja eftir henni.
4
Tó skulu tit lata vera einar 2000 alin millum tykkum og hana – nærri mugu tit ikki koma henni – so tit kunnu vita leiðina, ið tit skulu ganga; tí henda vegin hava tit ikki farið áður.“
5
Og Josva segði við fólkið: „Halgið tykkum! Tí í morgin fer HARRIN at gera undurverk millum tykkara.“
6
Síðani segði Josva við prestarnar: „Takið sáttmálaørkina og gangið undan fólkinum!“ Teir tóku tá sáttmálaørkina og gingu undan fólkinum.
7
HARRIN segði við Josva: „Í dag byrji Eg at gera teg stóran í eygum als Ísraels, so tey skulu vita, at sum Eg var við Mósesi, so skal Eg vera við tær.
8
Tú skalt geva prestunum, ið bera sáttmálaørkina, hetta boð: „Táið tit eru komnir tætt at vatninum í Jordan, skulu tit steðga har við Jordan!““
9
Josva segði nú við Ísraelsmenn: „Komið higar og hoyrið orð HARRANS Guds tykkara!“
10
Og Josva segði: „Av hesum skulu tit sanna, at hin livandi Gud er mitt ímillum tykkara, og at Hann vissuliga skal reka burt fyri tykkum Kána’anitar, Hetitar, Hevitar, Perizitar, Girgasitar, Amoritar og Jebusitar:
11
Sáttmálaørk Hansara, sum er Harri yvir allari jørðini, fer undan tykkum út í Jordan.
12
Veljið tykkum nú út tólv menn av ættum Ísraels, ein mann fyri hvørja ætt!
13
Og við tað sama sum prestarnir, ið bera ørk HARRANS, Hansara, sum er Harri yvir allari jørðini, stíga føturnar í vatn Jordans, skal vatnið í Jordan – vatnið, ið omanífrá kemur – steðga, so tað stendur sum veggur.“
14
Táið nú fólkið helt avstað úr tjøldum sínum til at fara um Jordan, við prestunum, ið ørkina bóru, á odda,
15
og teir, ið ørkina bóru, komu at Jordan, og prestarnir, ið ørkina bóru, stigu við fótunum í vatnið innast við land – men Jordan fløddi yvir allar bakkar sínar alla heystartíðina –
16
tá steðgaði vatnið, ið omanífrá kom, og stóð sum veggur langt burtur, við býin Ádam, sum liggur tætt við Zaretan; men tað, sum rann oman móti vatninum á slættlendinum – Salthavi – rann heilt burtur. So fór fólkið yvirum, beint yvir av Jeriko.
17
Men prestarnir, ið bóru sáttmálaørk HARRANS, stóðu á turrum mitt í Jordan og fluttu seg ikki; og alt Ísrael fór yvirum á turrum, inntil alt fólkið var komið yvir um Jordan.